काठमाडौं । नेकपा एमालेको ११औँ महाधिवेशनअन्तर्गत आजदेखि बन्दसत्र सुरु हुँदैछ ।
बन्दसत्र दिउँसो १२ बजेबाट काठमाडौंको भृकुटीमण्डपमा हुने प्रचार विभाग प्रमुख राजेन्द्र गौतमले जानकारी दिए । बिहान ८ बजेबाट सुरु हुने भनिए पनि केन्द्रीय समितिको बैठक बस्नुपर्ने भएकाले बन्दसत्रको समय सारिएको हो ।
बन्दसत्रमा देशभरबाट चयन भएका २ हजार २६२ जना प्रतिनिधि सहभागी हुनेछन ।
उनीहरूले एक अध्यक्ष, एक महासचिव, तीन उपाध्यक्ष, तीन उपमहासचिव र सात सचिवसहित २५१ सदस्यीय केन्द्रीय समिति चयन गर्नेछन ।
महाधिवेशनको उद्घाटन हिजो भक्तपुरको सल्लाघारीमा भएको थियो । विधान महाधिवेशन भने यसअघि नै सम्पन्न भइसकेकाले एमाले आजबाट सिधै नेतृत्व चयन प्रक्रियामा प्रवेश गर्न लागेको हो ।
नेतृत्वका लागि हालका अध्यक्ष केपी शर्मा ओली र वरिष्ठ उपाध्यक्ष ईश्वर पोखरेल दाबेदार छन ।
सहमतिका आधारमा नेतृत्व चयन गर्ने प्रयास गरिने भए पनि सहमति जुट्न नसके मतदानमार्फत निर्णय गर्ने एमालेको तयारी छ । मतदान भए विद्युतीय भोटिङ मेसिन प्रयोग गरिने जनाइएको छ ।
तस्वीरः अनलाइनखबर
Categorized in राष्ट्रिय
