काठमाडौं । अमेरिकाको इदाहो राज्यस्थित क्यानफिल्ड पहाडमा लागेको डढेलो नियन्त्रण गर्न पुगेको अग्निनियन्त्रक टोलीमाथि अज्ञात हतियारधारी समूहले आक्रमण गरेको छ ।
आक्रमणमा दुई जनाको मृत्यु भएको छ भने एक जना गम्भीर घाइते भएको अन्तर्राष्ट्रिय सञ्चार माध्यमहरुले जनाएको छ ।
सीएनएनका अनुसार आइतबार स्थानीय समयअनुसार दिउँसो १ः३० बजे उक्त घटना भएको हो । जंगलबाट स्नाइपरले गोली चलाएको प्रारम्भिक रिपोर्ट आएको छ ।
अझै नियन्त्रणमा छैन आक्रमणकारी
प्रहरीका अनुसार आक्रमणकारीहरू अझै पनि नियन्त्रणमा आएका छैनन्। ठूलो संख्यामा सुरक्षाकर्मी, एफबिआइ टोली तथा हेलिकप्टर परिचालन गरिएको छ तर डढेलोबाट उत्पन्न धुवाँका कारण खोजी अभियानमा कठिनाइ भइरहेको छ ।
सतर्कता अपील
प्रसिद्ध हाइकिङ गन्तव्य भएको उक्त क्षेत्रको आसपासमा रहेका नागरिकहरूलाई उच्च सतर्कता अपनाउन भनिएको छ ।
आक्रमणकारीको संख्याबारे ठोस जानकारी नभए पनि कम्तीमा तीनदेखि चार जना स्नाइपर भएको अनुमान गरिएको छ ।
आत्मसमर्पणको अवस्था नदेखिएकोले केही दिनसम्म अपरेसन चल्न सक्ने बताएका छन ।
Categorized in अन्तर्राष्ट्रिय
