काठमाडौँ । काठमाडौंको बसन्तपुरस्थित मखन टोलमा विहिवार दिउँसो भीषण आगलागी भएको छ ।
काठमाडौँ महानगरपालिका–१८ स्थित दिउँसो १२ः४५ बजे स्थानीय प्रमोद तुलाधरको घरमा आगलागी भएको प्रहरीले बताएको छ ।
प्रहरी प्रवक्ता उत्तमराज सुुवेदीका अनुसार मासु पसल र कस्मेटिक पसलसमेत रहेको स्थानीय तुलाधरको घरमा आगलागी हुँदा ठुलो मात्रामा क्षति भएपनि पुर्ण विवरण आएको छैन ।
स्थानीयवासी,नेपाल प्रहरी, नेपाली सेना र सशस्त्र प्रहरीले दिउँसो ३ बजे निभाएको उहाँले जानकारी दिनुभयो ।
आगलागी भएको घर नजिक ग्यास स्टोर भएकोले आगो नियन्त्रण लिन समय लगको थियो । स्थानीयवासीका अनुसार ग्यास सिलिण्डरहरु विस्फोटन हुँदा सो क्षेत्र आतंकति बनेको थियो ।
आगो निभाउन विभिन्न क्षेत्रका चार दमकलको प्रयोग गरिएको थियो । सो क्रममा दोलखाका २१ वर्षीय राजन थापा घाइते भएकाले उनको अहिले ट्रमा सेन्टरमा उपचार भइरहेको प्रहरीले जनाएको छ । आगलागीबाट नजीकका केही घरमा समेत क्षति पुगेको बताइएको छ ।
आगलागी कारण खुल्ने नसकेको प्रहरीले बताए ।
Categorized in समाज
