काठमाडौं । नेपाली कांग्रेसको जारी १५औँ महाधिवेशनअन्तर्गत केन्द्रीय कार्यसमितिका विभिन्न पदमा उम्मेदवारी दिनेहरूको प्रथम नामावली सार्वजनिक भएको छ ।
केन्द्रीय निर्वाचन समितिले सभापतिदेखि केन्द्रीय सदस्यसम्मका उम्मेदवारहरूको प्रारम्भिक सूची सार्वजनिक गरेको हो ।
महाधिवेशनबाट कांग्रेसको केन्द्रीय कार्यसमितिको आकार बढाएर २९७ सदस्यीय बनाइएको छ ।
नयाँ संरचनाअनुसार एक सभापति, एक वरिष्ठ उपसभापतिसहित चार उपसभापति, एक महिलासहित तीन महामन्त्री, ११ निर्वाचित र चार मनोनीत गरी १५ सहमहामन्त्री रहनेछन्। यस्तै, एक मनोनीत कोषाध्यक्ष र ६६ मनोनीत केन्द्रीय सदस्य रहने व्यवस्था गरिएको छ ।
सभापतिमा तीन जनाको उम्मेदवारी
सभापति पदका लागि गगन थापा, किशोरसिंह राठौर र श्यामकृष्ण खड्गीले उम्मेदवारी दिएका छन् ।
वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसालको मात्र उम्मेदवारी परेकाको उक्त पदमा दुवै जना निर्विरोध निर्वाचित भएका छन ।
खुला उपसभापति पदमा डा. चन्द्र भण्डारी, देवराज चालिसे, सुरेन्द्रराज पाण्डे, मधु आचार्य, डा. मिनेन्द्र रिजाल, दीपक गिरी, धनराज गुरुङ, गोविन्द भट्टराई र डा. चन्द्रमोहन यादव८८ले उम्मेदवारी दिएका छन ।
समावेशी उपसभापतिमा जीवन परियार, विनोद चौधरी, फर्मुल्लाह मन्सुर, सीता गुरुङ र रञ्जित कर्ण उम्मेदवार बनेका छन ।
महामन्त्रीमा ११ उम्मेदवार
खुला महामन्त्री पदमा प्रदीप पौडेल, गुरुराज घिमिरे, उदयशमशेर राणा, अमरसिंह पुन, नैनसिंह महर, शंकर तिवारी, डा. सुनिल शर्मा र डा. सन्तोष उपाध्यायले उम्मेदवारी दिएका छन ।
महिला महामन्त्री पदमा डा. डिला संग्रौला, डिना उपाध्याय र रिता खनाल को उम्मेदवारी परेको छ ।
निर्वाचन समितिका अनुसार प्रथम नामावलीमाथि दाबी–विरोध वा आपत्ति भएमा आज बिहान १० बजेदेखि १२ बजेसम्म आवश्यक कागजातसहित केन्द्रीय निर्वाचन समितिको कार्यालयमा सम्पर्क गर्न सकिनेछ । दाबी–विरोध र आपत्तिको प्रक्रिया पूरा भएपछि उम्मेदवारहरूको अन्तिम नामावली सार्वजनिक गरिनेछ ।
भोलि मतदान, तीन स्थानमा मतदान केन्द्र
महाधिवेशनको निर्वाचन भोलि हुने तय भएको छ ।
मतदानका लागि राष्ट्रिय सभागृह, खुलामञ्च र प्रज्ञा भवनलाई मतदानस्थल तोकिएको छ।
राष्ट्रिय सभागृहमा बागमती प्रदेशका प्रतिनिधिले मतदान गर्नेछन्।
खुलामञ्चमा कोशी, मधेस, कर्णाली र सुदूरपश्चिम प्रदेशका साथै भातृ तथा शुभेच्छुक संस्था र जनसम्पर्क समितिका प्रतिनिधिले मतदान गर्नेछन ।
त्यसैगरी, गण्डकी र लुम्बिनी प्रदेशका प्रतिनिधिले प्रज्ञा भवनमा मतदान गर्नेछन ।
मतदान सकिएलगत्तै मतगणना सुरु गरिनेछ ।
उम्मेदारको सुचि हेरौं
Categorized in राष्ट्रिय
