काठमाडौं । प्रतिनिधिसभाका नवनिर्वाचित सांसदहरूले यसपटक विभिन्न मातृभाषामा शपथ लिने भएका छन ।
शपथ ग्रहण चैत १२ गते हुँदैछ, जसमा कम्तीमा ९ भाषामा शपथ लिने तयारी गरिएको छ ।
काठमाडौं–८ बाट निर्वाचित विराजभक्त श्रेष्ठ र समानुपातिक सांसद कुलभक्त शाक्यले नेपाल भाषा (नेवारी) मा शपथ लिने भएका छन ।
त्यसैगरी, समानुपातिकतर्फका सांसद कृपाराम रानाले राना थारू भाषामा शपथ लिने भएका छन । त्यसैगरी सांसद गीता चौधरी र प्रमिलाकुमारी गच्छदारले थारू भाषा रोजेका छन ।
सुनसरी–४ बाट निर्वाचित दीपककुमार साहले मैथिली भाषामा शपथ लिने भएका छन्। त्यस्तै महोत्तरी–३ का उज्ज्वलकुमार झा र धनुषा–१ का मातृकाप्रसाद यादवले पनि मैथिली भाषामै शपथ लिनेछन ।
बाँके–२ बाट निर्वाचित मोहम्मद इश्तियाक राईले अवधी भाषामा शपथ लिने तयारी गरेका छन । उनी यसअघि पनि यही भाषामा शपथ लिँदै आएका छन ।
राष्ट्रिय प्रजातन्त्र पार्टी (राप्रपा) की समानुपातिक सांसद खुश्बु ओलीले भने संस्कृत भाषामा शपथ लिने तयारी गरेकी छन ।
संघीय संसद् सचिवालयका अनुसार हालसम्म २४ जना सांसदहरूले आफ्नो मातृभाषामा शपथ लिने जानकारी दिएका छन ।
शपथ सम्बन्धी ऐन २०७९ ले सांसदहरूलाई मातृभाषामा शपथ लिन सक्ने कानुनी व्यवस्था गरेको छ ।
नेपालको संविधानले बहुभाषिक र बहुसांस्कृतिक पहिचानलाई अंगीकार गरेकाले मातृभाषामा शपथ लिने अभ्यासलाई समावेशी लोकतन्त्रको महत्वपूर्ण संकेतका रूपमा हेरिएको छ ।
Categorized in राष्ट्रिय
