काठमाडौं । धरहरा क्षेत्रमा निर्माण गरिएको सवारी साधन पार्किङको सञ्चालन तथा व्यवस्थापन अब काठमाडौं महानगरपालिका ले गर्ने भएको छ ।
शुक्रबार धरहरा क्षेत्रमा बसेको नेपाल सरकार र महानगरबीचको छलफलले पार्किङ व्यवस्थापनको जिम्मा महानगरलाई दिने सहमति गरेको हो ।
नयाँ सहमतिअनुसार धरहराभित्र रहेको पार्किङको सञ्चालन र व्यवस्थापन महानगर प्रहरी बलले गर्नेछ । पार्किङ क्षेत्रको सुरक्षासहितका अन्य आवश्यक प्रबन्ध पनि नगरप्रहरीमार्फत नै अघि बढाइने जनाइएको छ ।
बैठकले धरहरा क्षेत्रको समग्र सञ्चालनका लागि तत्कालीन तथा दीर्घकालीन योजना तयार गर्न अध्ययन समिति गठन गर्ने निर्णय पनि गरेको छ ।
समितिले परियोजना सञ्चालन, प्रारूप तथा व्यवस्थापन मोडालिटीबारे अध्ययन–विश्लेषण गरी सुझावसहितको प्रतिवेदन पेश गर्नेछ ।
यसका लागि सहरी विकास मन्त्रालय र काठमाडौं महानगरले तोकेका पदाधिकारीहरूको संयुक्त समिति गठन गरिनेछ ।
काठमाडौं महानगरपालिकाकी कार्यवाहक प्रमुख सुनिता डंगोल ले धरहराको बाहिरी संरचनासम्बन्धी आवश्यक काम महानगरले गर्ने जानकारी दिइन ।
उनले धरहराको समग्र सञ्चालन व्यवस्थापन पूर्ण रूपमा महानगरलाई हस्तान्तरण गर्न संघीय सरकारसँग आग्रहसमेत गरेको बताइन ।
सुन्धारास्थित धरहराको बाहिरी स्वरूपको व्यवस्थापन महानगरले गर्ने सहमति भएको बताए । बाहिरी संरचनाको आर्थिक दायित्व महानगरले व्यहोर्नेछ भने पार्किङ र सुरक्षासम्बन्धी काम तत्काल अघि बढाइने छलफल भएको थियो ।
छलफलमा गृहमन्त्री ओमप्रकाश अर्याल लगायत सरोकारवाला निकायका प्रतिनिधिहरूको सहभागिता रहेको थियो ।
समिति गठनपछि धरहराको पूर्ण व्यवस्थापन हस्तान्तरणका लागि आवश्यक मोडालिटी तयार पारिने बताइएको छ ।
Categorized in पालिका
