काठमाडौं । प्रमुख प्रतिपक्षी दल नेपाली कांग्रेसले सहकारी ठगीविरुद्ध काठमाडौंमा प्रदर्शन गर्ने भएको छ ।
आज आइतवार काठमाडौंको प्रदर्शनीमार्ग भृकुटीमण्डपमा खुला सभा गर्ने भएको छ ।
दिउँसो १ बजे प्रदर्शन सुरू हुने भएकोले काठमाडौंका तीनै जिल्लाबाट सहभागी हुने गरी उपत्यकाव्यापी प्रदर्शन गर्न लागिएको हो ।
सोका लागि काठमाडौंका १० क्षेत्र अनुसार क्रमशः उमेशजंग रायमाझी, सीता थपलिया ‘उर्मिला’, रंगमति शाही, कुन्दन काफ्ले, नैनसिंह महर, गुरु बराल, आङ्गेलु शेर्पा, अब्दुल सतार, डा डिला संग्रौला र प्रकाश स्नेहीलाई तोकिएको छ ।
ललितपुरका ३ क्षेत्रमा क्रमशः दिलमान पाख्रिन, देवेन्द्रराज कँडेल र अर्जुन जोशी प्रतिनिधि बनेका छन ।
त्यस्तै, भक्तपुरका २ क्षेत्रका लागि हरिशरण नेपाली र गणेश लामा प्रतिनिधि बनेका छन ।
सहकारी पीडितको रकम फिर्ता, संसदीय छानबिन समितिको माग, गृहमन्त्री रवि लामिछानेको अभिव्यक्ति लगायतका मुद्दा बनाएर सडक प्रदर्शन गर्ने निर्णय गरेको थियो ।
बुधबार बसेको केन्द्रीय समिति र संसदीय दलको संयुक्त बैठकले निर्णय गरे अनुसार कांग्रेसले आजदेखि सडक प्रदर्शन सुरू गर्न लागेको हो।
सहकारी प्रकरणमा संसदीय छानबिन समिति बनाउन संसदबाट र सडकबाट पीडितको पक्षमा आवाज उठाउने भएको हो ।
Categorized in सहकारी
