काठमाडौं । नेकपा एमालेको मध्यपाहाडी लोकमार्ग केन्द्रित ‘समृद्धिको लागि संकल्प यात्रा’ समापन भएको छ ।
आइतवार सो यात्रा १८ औ दिन पुरा गरेर पाँचथरको चिवाभन्ज्याङमा एमाले अध्यक्ष केपी शर्मा ओलीले केहीबेर अघि राष्ट्रिय झण्डोत्तलन गरेपछि यात्रा औपचारिक रुपमा समापन भएको हो ।
मंसिर १४ मा बैतडीको झुलाघाटबाट सुरु भएको उक्त यात्रा लगभग २ हजार किलोमिटर मध्यपहाडी यात्राको औपचारिक समापन नेपालको पाँचथर र भारत सिक्किमको सीमास्थित चिवा भञ्ज्याङमा दिउँसो सवा १२ बजे भएको हो ।
ओलीले यात्रामा सहभागीहरुलाई धन्यवाद दिदै राजनीतिक हिसाबले जनतामा निराशा फैलाइएको अवधिमा यात्राले जनतामा उत्साह फैलिएको विश्वास व्यक्त गरे ।
आफ्ना ठाउँका विशेषता, परिचय, समस्यालगायतका विषय ध्यानाकर्षण, मागपत्र ज्ञापनपत्रद्वारा नागरिकबाट बुझ्ने मौका पाएको अध्यक्ष ओलीले बताए ।
‘देशको राजनीति अलमलमा छ, देशको समय, जनताको आयु, पिँढीको समय खेर गएको छ,’ अध्यक्ष ओलीले भने, ‘संकल्प यात्राले देश विकास र समृद्धिको दिशामा अघि बढाउन असाधारण भूमिका खेलेको छ ।’
Categorized in राष्ट्रिय