काठमाडौं । ललितपुर महानगरपालिकाले यो बर्ष पनि निजी विद्यालय खोल्न नदिने भएको छ ।
नगरभित्रको विद्यालयलाई व्यवस्थित गर्ने भन्दै महानगरपालिकाले नयाँ निजी विद्यालयलाई सञ्चालनको अनुमति नदिने निर्णय गरेको हो ।
महानगरपालिका नगर शिक्षा अधिकारी महेन्द्रबहादुर क्षेत्रीका अनुसार महानगरपालिकाभित्र कम दूरीमा नै धेरै निजी विद्यालय भएकाले त्यसलाई व्यवस्थित गर्नका यस्तो गरिएको हो ।
हाल महानगर क्षेत्रभित्र १८२ निजी र ४० संस्थागत गरी कुल २२२ विद्यालय रहेका छन । नक्साङ्कनको अभावमा कम दूरीमा नै धेरै विद्यालय रहेको नगर शिक्षा अधिकारी क्षेत्रीको भनाई छ ।
अहिले कुमारीपाटी, लगनखेल, जावलाखेल लगायतका भित्रि भागमा कम दूरीमा धेरै विद्यालय रहेका छन ।
अहिले सञ्चालनमा रहेका विद्यालयलाई कसरी व्यवस्थित गर्न सकिन्छ भन्ने छलफल भइरहेको शिक्षा अधिकारी क्षेत्रीले बताए ।
तीन चार वर्ष पहिलेसम्म निजी विद्यालय बढिरहँदा पनि सामुदायिक विद्यालय समायोजनमार्फत कम भएको महानगरपालिकाले जनाएको छ । त्यसयता भने सामुदायिक विद्यालयको समायोजन हुन नसकेको नगर शिक्षा अधिकारी क्षेत्रीले बताए ।
विद्यार्थी सङ्ख्या कम भएका विद्यालयको व्यवस्थापनका लागि महानगरपालिकाले जोड दिएको छ ।
Categorized in समाज
