काठमाडौं । राष्ट्रिय सभा निर्वाचनका लागि बिहीबार भएको मतदान अन्तिम चरणमा पुगेको छ ।
७ प्रदेशका मतदान केन्द्रहरूमा शान्तिपूर्ण मतदान भएको निर्वाचन आयोगले जनाएको छ ।
निर्वाचन आयोगका अनुसार १९ सिटका लागि विभिन्न ८ दलबाट ५१ जना चुनावी मैदानमा प्रतिस्पर्धामा देखिएको छ ।
बिहान ९ बजेदेखि अपराह्न ३ बजेसम्म मतदानको समय तोकिएको छ ।
कोशीका निर्वाचन अधिकृत विष्णुप्रसाद गौतमका अनुसार प्रदेश सभा सदस्य सबैले मतदान गरिसकेका छन ।
कोशीमा ९३ जना प्रदेश सभा सदस्य छन भने २७३ मध्ये २७१ जनाले मतदान गरेको छ ।
लुम्बिनी प्रदेशमा ३०५ जना मतदाता रहेका छन । निर्वाचनको पछिल्लो अपेडेट अनुसार ८७ जना प्रदेश सभा र स्थानीय तहका २१८ जना रहेका छन ।
निर्वाचनमा कुल दुई हजार ४७ मतदाता रहेको आयोगले जानकारी दिएको छ ।
कोशीमा ३६७, मधेसमा ३७४, वाग्मतीमा ३४७ मतदाता रहेका छन । यस्तै, गण्डकीमा २३०, लुम्बिनीमा ३०५, कर्णालीमा १९६, सुदूरपश्चिममा २२८ मतदाता रहेको निर्वाचन आयोगले जनाएको छ ।
फागुन २० गतेबाट रिक्त हुन लागेका २० पदमध्ये १९ पदमा आज निर्वाचन हुन लागेको हो । एक पद भने राष्ट्रपतिबाट मनोनीत गरिने छ।
प्रदेश सभा सदस्यहरूको मतभार ५३ र गाउँपालिका अध्यक्ष÷उपाध्यक्ष र नगरपालिका प्रमुख÷उपप्रमुखको मतभार १९ छ। राष्ट्रिय सभा सदस्य निर्वाचनमा प्रदेश सभा सदस्य ५४९ जना र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख १४९८ जना गरी जम्मा २०४७ मतदाता छन ।
आजै मतपरिणाम आउने निर्वाचन आयोगले जनाएको छ ।
Categorized in राष्ट्रिय