काठमाडौं । काठमाडौं महानगरपालिकाका मेयर विद्यासुन्दुर शाक्यले असनमा नेवाः फुड फेस्टिवलको शुभारम्भ गरेको छ ।
शनिवार आयोजित एक दिने फुड फेस्टिभलको उद्घाटन गर्दे मेयर शाक्यले काठमाडौंको मौलिकता भनेको सम्पदा, संस्कृति, नेवाः संस्कृति र पहिचान भएको बताए ।
प्राचीन महत्व बोकेका मठ मन्दिर, बहाल बहिल तथा चोकजस्ता मूर्त सम्पदा र बाजागाजा तथा नाचको संरक्षण तथा प्रबर्धनका लागि महानगरले सहयोग गर्ने मेयर शाक्यले प्रतिवद्धता जनाए ।
असनको ऐतिहासिकता प्रवर्धन गर्न उदेश्यले नेपाल संवत न्हुँद राष्ट्रिय समारोह समितिको आव्हानमा कामपा २७ वडा र असन सेवा समितिको संयुक्त आयोजनामा उक्त फेस्टिभलको आयोजना गरिएको हो ।
‘नेपा या, म्हसीका, नेपा या गौरव, राज्यं हे छ्यलेमा नेपाल संबत (नेपालको पहिचान र गौरव भएको नेपाल संबत सरकार आफैंले सञ्चालन गर्नुपर्छ)’ नारासहित असन चोकमा महोत्सव चलाइएको थियो ।
महोत्सवमा यमरी, बारा, मःम, छोइला, कचिला, सफुमिचा, चोही, बः लगायत परम्परागत नेवारी खाजाका स्टल, नेवारी साहित्य, सृजना र संस्कृति सम्बन्धि पुस्तकका स्टलहरु राखिएका छन ।
त्यसैगरी महोत्सवमा नेपाल लिपि गुथिले रञ्जना क्लालिग्राफी अभियान सञ्चालन गरेको छ भने परम्परागत नाच र गायन गरी ३० वटा प्रस्तुति पनि राखिएका छन ।
सो अवसरमा नेपाल संवत न्हुँद राष्ट्रिय समारोह समितिका संयोजक रमेश महर्जन, महानगरकी उपप्रमुख हरिप्रभा खड्गी श्रेष्ठ, कवडा सदस्य नरेश महर्जन लगायतले आ–आफ्नो मन्तव्य राखेका थिए ।
तस्वीरहरुः रमेश शाक्य
Categorized in सम्पदा/संस्कृति