काठमाडौँ । काठमाडौं महानगरपालिकाले छात्रबृत्ति अध्ययनको लागि लिएको कक्षा ११ को प्रवेश परिक्षाको अन्तिम नतिजा प्रकाशित गरिएको छ ।
मंगलवार महानगरले प्रकाशित गरेको नतिजा अनुसार विज्ञान संकायमा ३ हजार ४९३ जनाको नाम प्रकाशित गरिएको छ ।
त्यसैगरी, व्यवस्थापन संकायमा ८६७, मानविकीमा ४ जना, शिक्षामा ५, कानुन संकायमा ५२ र प्रविधिमा १३० जना विद्यार्थीहरको नाम प्रकाशित भएको हो ।
कुल चार हजार ५५१ जना छात्रबृत्तिको कोटामा सफल भएको छ । यस अघि प्रवेश परीक्षामा ५ हजार १६२ जना विद्यार्थी सहभागी भएका थिए ।
महानगरपालिकाभित्र छात्रवृत्ति प्रदान गर्ने १६६ वटा उच्च माध्यमिक विद्यालय रहेको शिक्षा अधिकारी सीताराम कोइरालले जानकारी दिए ।
छात्रवृत्ति वितरण गर्दा सामुदायिक विद्यालयमा अध्ययन गरेका विद्यार्थीलाई ४० प्रतिशत, संस्थागत विद्यालयबाट छात्रवृत्तिमा अध्ययन गरेका विद्यार्थीलाई ५ प्रतिशत, काठमाडौँ महानगरपालिका भित्र स्थायी बसोबास भएका सबै विद्यार्थीका लागि ९ प्रतिशत प्रदान गरिनेछ ।
त्यसैगरी ल्याण्डफिल्ड साइड प्रभावित क्षेत्रमा बसोबास भई सोही क्षेत्रको विद्यालयमा अध्ययन गरेका विद्यार्थीका लागि १ प्रतिशत छात्रवृत्ति प्रदान गरिनेछ ।
बाँकी रहेको ४५ प्रतिशत सिटलाई शतप्रतिशत मानी सामुदायिक विद्यालयमा अध्ययन गरेका विद्यार्थीको हकमा लागू हुने गरी छात्रालाई ३३ प्रतिशत, आदिबासी र जनजातिलाई १५प्रतिशत, मधेसीलाई १२ प्रतिशत, खसआर्यलाई १७ प्रतिशत आरक्षण छात्रवृत्ति सिट उपलब्ध गराइनेछ ।
दलितलाई ९ , मुस्लिमलाई २, थारुलाई ४, अपाङ्गता भएको व्यक्तिलाई २, पिछडिएको क्षेत्रका व्यक्तिलाई ४, सहिद र वेपत्ता पारिएका नागरिकका परिवार र द्वन्द्व पीडित नागरिकका परिवारलाई २ प्रतिशित छात्रवृत्ति दिइनेछ ।
पिछडिएको क्षेत्रका व्यक्तिका रुपमा अछाम, कालीकोट, जाजरकोट, जुम्ला, डोल्पा, बझाङ, बाजुरा, मुगु र हुम्ला जिल्लामा स्थायी बसोबास गरिरहेका विद्यार्थीलाई मानिनेछ ।
Categorized in समाज