काठमाडौं । काठमाडौं महानगरपालिकाको कामपा– १९ को स्वास्थ्य विभागमा कर्मचारी नियुक्त गर्ने निर्णय हेरफेरबारे गठित छानविन समितिले प्रतिवेदन बुुझाएको छ ।
सोमवार समितिले महानगरका प्रमुख प्रशासकिय अधिकृत प्रदीप परियारले प्रतिवेदनलाई प्रमाणिकरण गरेको छ । छानविन समितिले सो प्रकरणमा संलग्न २ कर्मचारीलाई बर्खास्त गर्न सिफारिस समेत गरेको छ ।
सहरी योजना आयोगका उपाध्यक्ष सुमन नरसिंह राजभण्डारीको नेतृत्वमा गठित छानबिन समितिले तयार परेको प्रतिवेदनले वरिष्ठ शाखा अधिकृत बिडारी र स्वास्थ्य विभाग प्रमुख पौडेललाई बर्खास्त गर्न सुझाव दिएकोे छ भने सचिवालय प्रमुख न्यौपानेलाई भने कार्यपालिकामा स्पष्टीकरण दिन बोलाउने भएको छ ।
वडा नम्बर १९ को स्वास्थ्य प्रवद्र्धन केन्द्रमा कार्यपालिकाको निर्णयविपरीत वरिष्ठ शाखा अधिकृत भगवती बिडारीले आफ्नै छोरी सुप्रिया ढुंगेललाई पठाउन नाम थपेपछि सो प्रकरण बाहिर आएको थियो ।
निर्णय हेरफेर प्रकरणमा महानगर प्रमुख बालेन शाहका सचिवालय प्रमुख नुरनिधि न्यौपाने, स्वास्थ्य विभाग प्रमुख रामप्रसाद पौडेल, वरिष्ठ शाखा अधिकृत भगवती बिडारी र प्रमुख प्रशासकीय अधिकृत बसन्त अधिकारीको संलग्नता भएको महानगरको आरोप छ ।
तत्कालीन प्रमुख प्रशासकीय अधिकृत बसन्त अधिकारीलाई सचेत गराउन सुझाएको छ । सो प्रतिवेदन महानगरको सुशासन समितिमा प्रतिवेदन पेश गर्ने महानगरले तयारी गरेको छ ।
Categorized in स्वास्थ्य
