महानगरका सफाईकर्मीलाई पिपिई दिईने
काठमाडौं । काठमाडौं महानगरका सफाई कर्मचारीहरुलाई व्यक्तिगत सुरक्षात्मक उपकरण (पिपिई)उपलब्ध गराउने भएको छ ।
काठमाडौं महानगरका प्रमुख बिद्यासुन्दर शाक्यले कर्मचारीलाई पहिलो प्राथमिकतामा राखेर फोहोर व्यवस्थापनका काम गर्ने सफाइकर्मीहरुलाई व्यक्तिगत सुरक्षात्मक उपकरण उपलब्ध गराउने बताएका छन ।
सफाईकर्मीहरु मध्ये औषधि छर्ने काममा खटिने, ल्याण्डफिल साइटमा खटिने, अस्पतालजन्य फोहोर संकलनमा खटिने ५० जनालाई सो उपकरण दिने भएको हो ।
काठमाडौं महानगरपालिका र कीर्तिपुर नगरपालिकासँगको साझेदारीमा गैर—सरकारी संस्था गुथिले ५०० सय सफाइकर्मीका लागि व्यक्तिगत सुरक्षात्मक सामाग्री उपलब्ध गराउने भएको छ ।
वाटर एड नेपालको सहयोग र फोहरमैला व्यवस्थापन संघ नेपालको सहकार्यमा उपलब्ध हुने सामाग्रीको नमूना गुथिका प्राबिधिक सल्लाहकार प्रकाश अमात्यले महानगरका प्रमुख शाक्यलाई शुक्रवार हस्तान्तरण गरेका छन ।
यो सुरक्षात्मक उपकरणमा सुरक्षा लुगा १ सेट, चस्मा एउटा, पञ्जा एक जोर, बुट एक जोर, मास्क ३ थान, १०० एमएलको स्यानिटाइजर, एउटा साबुन, एउटा रुमाल, एउटा बाल्टिन र एउटा मग हुनेछ ।
गुथिले कीर्तिपुर नगरलाई पनि सामाग्री हस्तान्तरण गरेको छ । काठमाडौं महानगरमा करीब ९५० कर्मचारी सरसफाइमा काम गर्छन ।
Categorized in समाज
