भारत–पाक विच रेलवे सम्झौता पनि बन्द, झनै तनाव बढ्दै
काठमाडौं । जम्मू –कश्मीरको विशेष राज्यको दर्जा खोसिएपछि बढेको तनावले भारत–पाक विच रेलवे सम्झौता पनि बन्द भएको छ ।
पाकिस्तानका रेलमन्त्री शेख रशिद अहमदले लाहौरबाट भारतको अटारीसम्म चल्ने सम्झौता एक्सप्रेस रेल सधैको लागि बन्द गर्ने घोषणा गरेको छ ।
मन्त्री अहमदले निर्णय सुनाउँदै भने,‘कश्मीरीमाथि उत्पीडन हुने र पाकिस्तानको सरकार तमासा हेरिरहने हुन सक्दैन । सम्झौता एक्सप्रेस सदा सदाका लागि बन्द गरिएको छ ।’
सम्झौता एक्सप्रेस भारत र पाकिस्तानबीच सातामा दुई दिन चल्ने रेलगाडी हो, जुन विभाजन अगाडिदेखि नै अटारीबाट लाहौरसम्म चल्दै आएको छ ।
सिमला सम्झौतापछि २२ जुलाई १९७६ मा लाहौरबाट अमृतसरसम्म चलाइएको थियो । तर १९९४ मा अटारीबाट लाहौरसम्म चलाउन थालियो ।
संविधानको अनुच्छेद ३७० निष्प्रभावी बनाएको प्रतिक्रिया स्वरुप पाकिस्तानले यो निर्णय लिएको हो । यस अघि भारतसँग व्यापारिक सम्बन्ध अन्त्य गर्ने घोषणा गरिसकेको छ ।
त्यसैगरी पाकिस्तानले आफ्ना राजदूत, उच्च पदस्थ अधिकारीहरुलाई फिर्ता बोलाएर भारतसँग राजनीतिक स्थिती सिमित बनाएको छ ।
पाकिस्तानले आफ्नो हवाई क्षेत्रमा भारतीय विमानलाई प्रवेश नदिने निर्णय पनि लिएको छ ।
Categorized in अन्तर्राष्ट्रिय
