काठमाडौं । कारागार व्यवस्था विभागले हालै फरार भएका कैदीबन्दीलाई असोज २० गतेभित्र फर्किन आग्रह गरेको छ ।
विभागले शुक्रबार जारी गरेको विज्ञप्तिमा तोकिएको समयभित्र नफर्किने कैदीबन्दीलाई कारागार ऐन, २०७९ र प्रचलित कानुनअनुसार कडा कारबाही हुने चेतावनी दिएको छ ।
भदौ २४ गते देशभरिका २८ वटा कारागार र ९ वटा बाल सुधारगृहबाट कैदीबन्दीहरू फरार भएका थिए । फरार भएकामध्ये आधाभन्दा बढी फर्किए पनि अझै हजारौँ कैदीबन्दी फरार रहेको विभागले जनाएको छ ।
आकडा अनुसार देशभर हाल ३० हजार ६४१ कैदीबन्दी रहेका छन ।
तिनमध्ये १४ हजार ४५९ जना फरार भएका थिए । तीमध्ये ७ हजार ७३५ जना स्वेच्छाले फर्किसकेका छन भने ६ हजार ८१४ जना अझै फरार छन ।
फरार कैदीबन्दीलाई नियन्त्रणमा ल्याउन विभागले हरेक जिल्लामा सहायक प्रमुख जिल्ला अधिकृतको संयोजकत्वमा ‘फरार बन्दी खोजी तथा पक्राउ कार्यदल’ गठन गरेको छ । यस कार्यदलमा सुरक्षाकर्मी तथा सम्बन्धित निकायका प्रतिनिधिहरू सहभागी हुनेछन ।
विभागले कैदीबन्दीहरूलाई स्वेच्छाले फर्किन आग्रह गर्दै नफर्किनेहरूलाई प्रहरीमार्फत पक्राउ गरी कारागार फिर्ता ल्याउने प्रक्रिया तीव्र रूपमा अगाडि बढाइने जनाएको छ ।
Categorized in राष्ट्रिय
