काठमाडौं । भक्तपुरमा नक्कली सुन देखाएर ठगी गर्ने गिरोहका ५ जनालाई प्रहरीले पक्राउ गरेको छ ।
काठमाडौं उपत्यका अपराध अनुसन्धान कार्यालय शाखा भक्तपुर र जिल्ला प्रहरी कार्यालय भक्तपुरको टोलीले उनीहरुलाई बोडेबाट पक्राउ गरेका हुन ।
पक्राउ पर्नेहरुमा सिन्धुपाल्चोकको बाह्रबिसे नगरपालिका–५ घर भई भक्तपुरको बोडे बस्ने ३८ वर्षीय छुल्टिम लामा, ३३ वर्षीय राजेन्द्र तामाङ, २७ वर्षीय चिनबहादुर तामाङ, बाह्रबिसे नगरपालिका–८ का ४८ वर्षीय जितबहादुर तामाङ र सोही नगरपालिका ५ घर भई मुलपानी बस्ने ३१ वर्षीय मिलन भन्ने दावा दुण्डुप तामाङ छन ।
प्रहरीका अनुसार सो गिरोहले एक किलो सुन भएको बताउँदै त्यसमा लगानी गर्न भनेर मध्यपुरथिमी नगरपालिकास्थित कोरियन अस्पताल नजिकै बस्ने २४ वर्षीया विनिता थापा मगरसँग ७ लाख ७५ हजार रूपैयाँ ठगेका थिए ।
प्रहरीले उनीहरूको साथबाट झन्डै ३ लाख रूपैयाँ समेत बरामद गरेको छ ।
Categorized in समाज