काठमाडौं । डेंगु रोग भक्तपुरमा महामारीको रुपमा फैलिँदै गएको अधिकारीहरुले बताएका छन ।
दुई साताको अवधिमा जिल्लामा १९७ जना बिरामीमा डेंगु रोग भएको पुष्टि भएपछि डेंगुको संक्रमण फैलिने संभावना झनै बढेको छ ।
जिल्ला जनस्वास्थ्य कार्यालय भक्तपुरका अधिकृत पार्थमणि न्यौपानेले भक्तपुर जिल्लामा बुधबारसम्ममा १९७ बिरामीमा डेंगु रोग भएको पुष्टि भएको बताए ।
यो रोगको सङ्क्रमण बढ्दै गएकोले अहिले प्रत्येक टोल, गल्ली र विद्यालय डेंगु रोगको जोखिममा रहेकाले जनचेतना फैलाउने कार्यलाई सबैले तीव्रता दिनुपर्ने न्यौपानेले बतँए ।
कार्यालयका प्रमुख कृष्णबहादुर मिजार अनुसार भक्तपुरमा डेंगु सङ्क्रमण नियन्त्रण बाहिर गएकोले भक्तपुरमा डेंगु सङ्क्रमणको उच्च जोखिममा रहेको बताए ।
जिल्लामा सबभन्दा बढी भक्तपुर नगरपालिका क्षेत्रमा डेंगु सङ्क्रमित बिरामी भेटिएको मिजारले जानकारी दिए ।
प्रमुख मिजारले मानव बस्तीको बीचबीचमा पानीको स्रोत खुला भएको ठाउँमा डेंगु सार्ने लामखुट्टे बढी पाइने भएकाले डेंगु नियन्त्रण गर्न डेंगु फैलाउने लामखुट्टेको खोज र नष्ट गराँै अभियान सञ्चालन गर्नुपर्ने बताए ।
Categorized in स्वास्थ्य