काठमाडौं । येँयाः (इन्द्रजात्रा)को अवसरमा विहिवार बसन्तपुरमा हल्चोक भैरव (सवःभकु), पुलु किशी, मजिपा लाखे र महाकाली नाँच प्रस्तुत गरिएको छ ।
सो अवसरमा हनुमानढोका दरवार क्षेत्र संरक्षण कार्यक्रमका संयोजक एंव २४ वडा अध्यक्ष विनोदकुमार राजभण्डारीले हल्चोक आकाश भैरव गुठीका अध्यक्ष सागर पुतुवारलाई एकलाखको चेक हस्तान्तरण गरेका छन ।
अध्यक्ष राजभण्डारीले पुलिकिसी, मिजपा लाखे र महाकाली नाँचलाई पनि एक/एक लाखको चेक हस्तारन्तरण गरेको जानकारी दिए ।
इन्द्रजात्राका अवसरमा प्रदर्शन गरिने देवगणसँग सम्बन्धित तथा जात्रा मनाउनुको किंवदन्तीसँग सम्बन्धित परम्परागत नृत्यलाई काठमाडौँ महानगरपालिकाले यस वर्षदेखि पूजासहित प्रदर्शन परम्पराको थालनी गरेको उनले बताए ।
यस अवसरमा गरिएको देवगणहरुको नृत्य प्रदर्शन कार्यक्रममा प्रमुख अतिथि काठमाडौँ महानगरपालिकाका प्रमुख बालेन्द्र शाह (बालेन), महानगर प्रवक्ता नविन मानन्धर र मूल समारोह समितिका संयोजक आशामान संगतको उपस्थिती रहेको थियो ।
त्यसैगरी, उपत्यकाका स्थानीय तहका प्रमुख, उपप्रमुख र प्रमुख प्रशासकीय अधिकृतहरुलाई आमन्त्रण गरिएको थियो ।
कार्यक्रम यँया ११४४ महानगर विशेष कार्यक्रम सञ्चालन मूल समारोह समितिले आयोजना गरेको थियो ।
Categorized in सम्पदा/संस्कृति
