प्रमुख शाक्यद्धारा वडा नं. १० को अनुगमन
काठमाडौं । काठमाडौं महानगरपालिका प्रमुख विद्यासुन्दर शाक्यले कामपा वडा नं.१० को बुधवार स्थलगत भ्रमण गरेका छन ।
प्रमुख शाक्यले सो वडा भएका विकास गतिविधिहरु नियाल्दै वडावासीहरुको जनगुनासोहरु सुन्न भ्याए ।
शाक्यले वडा क्षेत्रको पूर्वाधार तथा सामाजिक बिकासका काममा महनगरले भरपुर सहयोग गर्ने वडावासीसँग विश्वास व्यक्त गरेका थिए ।
वडा १० क्षेत्रका टोल र गल्लीहरुको अवस्था, पूर्वाधारको आवश्यकता र वडाले सम्पादन गरिरहेका कामका बारेमा जानकारी लिँदै बुद्धनगर, नयाँ बानेश्वर, गंगादेवी मन्दिर, सहभागिता मार्ग, देवीनगर, पुजा–प्रतिष्ठान मार्ग, युएन पार्कलगायतका क्षेत्रमा पुगेका थिए ।
सो भ्रमण टोलीमा वडाध्यक्ष रामकुमार केसी, वडा सदस्यहरु सतिस तण्डुकार, नरोज अर्याल, सुनिता भित्रकोटी, रोहिनी श्रेष्ठ, वडासचिव प्रकाश खड्का, पूर्वाधार बिकास बिभागका प्रमुख डा. उत्तरकुमार रेग्मी लगायतका सहभागी भएका थिए ।
सडकका खाल्टाखुल्टी पुर्ने, सहायक बाटाहरु भत्किएको ठाउँमा तत्काल मर्मत गर्ने, पैदल मार्ग बनाउने काम अब महानगरको जिम्मा आएको छ ।
महानगरले यस वडाबाट सञ्चालन हुने वडास्तरीय योजनाका लागि ३ करोड रुपैयाँ बिनियोजन भएको छ । यससँगै महानगरको ३९ औं कार्यपालिका बैठकले बिनियोजित रकमको ५० प्रतिशत थप गरेर पठाउने निर्णय गरेसँग अब यस वडाले थप १ करोड ५० लाख रुपैयाँ प्राप्त गर्नेछ ।
मेयर शाक्यले यस अघि यसै गरी वडा नम्बर ७, ९, १६ र २६ को स्थलगत अवलोकन तथा अनुगमन गरिसकेका छन ।
Categorized in स्थानिय
