काठमाडौं । प्रतिनिधि सभाअन्तर्गत राज्य व्यवस्था तथा सुशासन समितिबाट नागरिकता ऐन, २०६३ संशोधन गर्न बनेको विधेयक पारित भएको छ ।
मंगलबार सिंहदरबारमा बसेको समितिको बैठकले उक्त विधेयक सर्वसम्मतरूपमा पारित गरेको हो ।
समितिका सभापति रामहरी खतिवडाले विधेयकले नागरिकता नभएका व्यक्तिहरूलाई नागरिकता प्राप्त गर्न सहयोग पुग्ने विश्वास व्यक्त गरे । साथै, विधेयक सर्वसम्मत रूपमा पारित गराउन सहयोग गर्ने सांसदहरूलाई धन्यवाद पनि दिए ।
सभापति खतिवडाले समितिबाट पारित भएको नागरिकसम्बन्धी विधेयक छिट्टै संसदमा पेस गरिने जानकारी समेत दिएका छन्।
विधेयकमा आमाका नामबाट मात्र पनि नागरिकता दिन सकिने कानुनी व्यवस्था समेटिएको छ ।
नेपाल नागरिकता ऐन २०६३ संशोधन गर्न ल्याइएको विधेयकमा आमा वा बाबु दुबैका नामबाट नागरिकता लिन सकिने र बाबुको नाम नखुलेमा आमाको स्वघोषणाका आधारमा वंशज वा अंगीकृत नागरिकता दिन सकिने व्यवस्था गरिएको छ ।
बाबुको नाम झूटो ठहरिएमा दण्डको व्यवस्था गरिएको छ ।
नाबालकका लागि परिचयपत्र जारी गर्ने, जिल्ला र इलाका प्रशासन कार्यालयबाट नागरिकता वितरण गर्ने, र नायब सुब्बा तहका कर्मचारीलाई नागरिकता दिन सक्ने अधिकार दिने व्यवस्था समेत विधेयकमा समेटिएको छ।
अब विधेयक प्रतिनिधिसभामा पेश भई पारित भएपछि राष्ट्रिय सभामा पठाइनेछ । अन्तिम प्रमाणीकरणपछि ऐनका रूपमा कार्यान्वयनमा जानेछ ।
Categorized in राष्ट्रिय
