काठमाडौं । दक्षिण कोरियाको राष्ट्रपति यून सुक योलविरूद्धको महाअभियोग प्रस्ताव पारित भएको छ ।
सत्तारूढ पार्टीले समेत राष्ट्रपति यून विरुद्धमत हालेपछि महाअभियोगको प्रस्ताव पारित भएको हो ।
२०४ मतले महाअभियोगको प्रस्ताव पारित भएको एशोसिएटेड प्रेस (एपी)ले जनाएको छ । विपक्षमा ८५ जनाले मत हालेका थिए ।
उक्त महाअभियोग प्रस्ताव पारित भएको सूचना संवैधानिक अदालतमा पुर्याइएपछि युनको राष्ट्रपतीय अधिकारबाट निलम्बनमा पर्नेछन ।
अदालतले १८० दिनभित्र उनलाई पदबाट हटाउने वा पुनस्र्थापना गर्ने भन्ने फैसला दिनुपर्नेछ । अदालतले उनलाई निकालेको अवस्थामा ६० दिनभित्र अर्काे चुनाव गरेर नयाँ राष्ट्रपति चुन्नुपर्ने संवैधानिक व्यवस्था छ ।
महाअभियोग प्रस्ताव दुई तिहाई मतबाट पारित गर्नुपर्छ। ३०० सदस्यीय कोरियाको संसदमा राष्ट्रपति यूनको सत्तारूढ दल पिपल्स पावर पार्टी (पिपिपी) का १०८ सांसद छन भने विपक्षीका १९० सांसद छन । दुई तिहाईले महाअभियोग प्रस्ताव पारित हुन पिपिपीकै सांसदहरूले प्रस्तावमा मत हालेपछि पारित भएको हो ।
यस अघि राष्ट्रपति यूनले सैनिक शासन लगाउने आफ्नो निर्णय न्यायोचित भएको र राष्ट्रपति पदबाट राजीनामा नदिने भन्दै भाषण गरेका थिए ।
Categorized in अन्तर्राष्ट्रिय
