काठमाडौं । सडक डिभिजन काठमाडौं मिनभवनले टेकु पुलको संरचना ७ दिनभित्र सुधार्न ठेकेदार कम्पनीलाई निर्देशन दिएको छ ।
पप्पु कन्स्ट्रक्सनले मापदण्ड विपरित टेकु पुलमा गलत ढंगले निर्माण गरेपछि रोक्न निर्देशन दिएको र संरचना सुधार्न पटक पटक सुचना जारी गरेपनि अटेर गरेपछि ७ दिने अल्टिमेट दिएको हो ।
निर्देशन अनुरुप काम नगर ठेक्का तोडेर नियमानुसार कारबाही हुने कार्यालयले जनाएको छ । करिव ६२ मिटर लामो पुल तत्कालिन दिगो शहरी यातायात आयोजनाबाट निर्माण गरिएको हो ।
तत्कालिन आयोजना प्रमुख अनन्त आचार्यका अनुसार यो पुलको फाउण्डेसनमा समस्या नभएपनि सुपर स्ट्रक्चरमा समस्या देखिएको छ ।
पुलमा प्रयोग गरिएको डण्डी र तार (केवल) मापदण्डभन्दा सानो र गुणस्तरहिन भएपछि तत्कालिन अवस्थामा पुलको काम रोकिएको थियो ।
तर पप्पुले रातारात आयोजनाको प्राविधिक (इन्जिनियर) नै नराखी ढलान गरेर काम फत्ते गरेको आयोजनाले थाहापाएपछि महानगरीय प्रहरीलाई पत्राचार गर्दै पुल संचालनमा रोक लगाउन भनेको थियो ।
एसियाली विकास बैकको करिव २० करोड १३ लाख रुपैयाँ ऋण सहयोगमा यो पुल निर्माण गरिएको हो ।
Categorized in स्थानिय