काठमाडौं । सामाजिक सञ्जाल बन्दको विरोधमा उत्रिएका जेनजीहरूको प्रदर्शनमा प्रहरीले गोली चलाउँदा मृत्यु हुनेको संख्या १६ पुगेको छ ।
ट्रमा सेन्टरमा थप दुई जनाको मृत्यु भएपछि विभिन्न अस्पतालमा मृत्यु हुनेको संख्या १६ पुगेको हो ।
अस्पताल स्रोतका अनुसार ट्रमा सेन्टरमा मात्रै ८ जना, सिभिलमा ३, एभरेष्टमा ३, केएमसीमा १ र त्रिवि शिक्षण अस्पतालमा १ जनाको मृत्यु भएको छ ।
कांग्रेसको आक्रोशः
नेपाली कांग्रेसका नेताहरूले गृहमन्त्री रमेश लेखकको तत्काल राजीनामा माग गरेका छन ।
केन्द्रीय सदस्य गोविन्द पोखरेलले गृहमन्त्रीले जिम्मेवारी लिनुपर्ने भन्दै राजीनामा दिन सुझाव दिएका छन । नेविसंघका नेतृ एलिजा ढकालले प्रधानमन्त्री केपी शर्मा ओलीलाई तानाशाहीको संज्ञा दिँदै कांग्रेस तत्काल सरकारबाट बाहिरिनुपर्ने माग गरेकी छन ।
माओवादीले माग्यो ओली सरकारको राजीनामा
प्रमुख प्रतिपक्षी दल नेकपा माओवादी केन्द्रले प्रधानमन्त्री ओलीले राजीनामा दिनुपर्ने निष्कर्ष निकालेको छ ।
गोरखामा बसेको नेताहरूको अनौपचारिक बैठकले ‘सरकारले नरसंहार गरेको’ भन्दै अभियान स्थगित गरी सबै शीर्ष नेताहरू काठमाडौं फर्कने निर्णय गरेको छ ।
उपमहासचिव जनार्दन शर्माले ‘आन्दोलनकारीहरूको प्रतिनिधित्वसहित संयुक्त राजनीतिक संयन्त्र निर्माण’ गर्नुपर्नेमा जोड दिएका छन ।
सरकारको तर्कः
यसैबीच सरकारका प्रवक्ता एवं सञ्चारमन्त्री पृथ्वीसुब्बा गुरुङले जेनजी आन्दोलनमा ‘अराजकतावादी र प्रतिगमनकारी घुसपैठ’ भएको दाबी गरेका छन ।
उनले संसद भवन र सिंहदरबारमा आक्रमण प्रयासपछि घटना दुःखद बनेको बताए ।
सामाजिक सञ्जाल तत्काल पुनः सञ्चालन गर्नेबारे कुनै निर्णय नभएको पनि उनले स्पष्ट पारे ।
Categorized in राष्ट्रिय
