काठमाडौं । आगामी जेठ २ देखि ४ गते सम्म काठमाडौंमा सगरमाथा संवाद हुने भएको छ ।
मंगलवार परराष्ट्रमन्त्री डा. आरजु राणाले पत्रकार सम्मेलनमा जानकारी दिँदै सगरमाथा संवादमा १ सय ७५ जना विदेशी प्रतिनिधिले सहभागिता जनाउने बताएकी छिन ।
संवादमा ३ सय ५० जना सहभागी रहने र संसदीय उपाध्यक्षदेखि मन्त्रीहरूको उपस्थिति रहने उनले जानकारी दिइन ।
संवादमा सहभागी हुने विदेशी उच्चस्तरीय प्रतिनिधिहरूले प्रधानमन्त्री केपी शर्मा ओलीसँग शिष्टाचार भेट गर्ने र समकक्षी मन्त्रीसँग साइडलाइन भेटवार्ताको व्यवस्था गरिएको उनको भनाइ छ ।
मन्त्री राणाकाअनुसार संवादको तयारी अन्तिम चरणमा पुगेको छ। तयारीस्वरुप सरकारले करिब १० वटा पूर्वसंवाद कार्यक्रम आयोजना गरेको छ ।
जसअन्तर्गत जुम्लामा हिमाली डायलग, काठमाडौंमा वायु संवाद, प्रि संवाद लगायत रहेका छन ्। तीन दिनसम्म सञ्चालन हुने संवाद कार्यक्रमको प्रधानमन्त्री केपी शर्मा ओलीले उद्घाटन गर्नेछन ।
१.५ डिग्री सेल्सियसभन्दा कम तापक्रम वृद्धिलाई सीमित गर्ने, पर्वतीय अर्थतन्त्रलाई दिगो बनाउने, टापुहरूमा भएको हानि र क्षति, लैङ्गिक र अन्तरपुस्तागत समानता लगायतका १२ वटा विभिन्न विषयमा छलफल हुनेछ ।
सगरमाथा संवाद ‘जलवायु परिवर्तनः हिमाल र मानवताको भविष्य’ भन्ने नारासहित सञ्चालन हुनेछ ।
Categorized in राष्ट्रिय
