चाडपर्वको नाममा विभिन्न पोशाक किन्न लगाउने विद्यालयलाई कार्वाही महानगरको चेतावनी
काठमाडौं । काठमाडौं महानगरपालिकाले केही विद्यालयहरुले बालबालिकालाई चाडपर्वका नाममा पोशाक किन्न लगाएको गुनासो प्राप्त भएको जनाएको छ ।
चाडपर्वका नाममा नियमित विद्यालय पोशाकभन्दा भिन्न पोशाक किन्न बाध्य पारेको गुनासो आएपछि महानगरले त्यसो नगर्न शुक्रवार परिपत्र गरेको छ ।
महानगरका शिक्षा अधिकारी सीताराम कोइरालाले सूचना निकालेर त्यस्ता विद्यालयलाई कारबाही गर्ने चेतावनी दिएका छन ।
‘तोकिएको विद्यालय पोशाकबाहेक अन्य पोशाक किन्न विद्यार्थीलाई बाध्य नगर्न सबै विद्यालयलाई अनुरोध गरिन्छ,’ सूचनामा भनिएको छ, ‘कोही कसैले यस परिपत्र विपरीत कार्य गरेको पाइएमा काठमाडौं महानगरपालिका शिक्षा ऐन २०७५ (संशोधनसहित) र अन्य प्रचलित कानुनबमोजिम दण्ड सजाय हुने व्यहोरा समेत जानकारी लागि अनुरोध छ ।’
Categorized in समाज
