गृह मन्त्रालयले भन्यो– ‘आधिकारिक परिचयपत्र बिना घर भाडा नदिनु’
काठमाडौं । गृह मन्त्रालयले कुनै पनि व्यक्तिलाई आधिकारिक परिचयपत्र विना घर भाडामा नदिन आग्रह गरेको छ ।
सोमवार मन्त्रालयले एक विज्ञप्ती जारी गरी पहिचान खुल्ने आधिकारिक परिचयपत्र नभएका कुनै पनि व्यक्तिलाई घर तथा कोठा भाडामा नदिन सर्वसाधारणलाई आव्हान गरेको हो ।
केही दिनका घटनाबाट कतिपय विदेशी नागरिक परिचय लुकाई अनधिकृत रुपमा नेपाल प्रवेश गरी बसोबास गर्ने प्रयास गरेको देखिएकाले आधिकारिक परिचयपत्रविना घर, अपार्टमेन्ट, फ्ल्याट तथा कोठामा भाडामा नदिन र त्यस्ता व्यक्तिलाई काममा नलगाउन पनि आग्रह गरेको जारी विज्ञप्तीमा उल्लेख छ ।
आज बिहान काठमाडौंको सिनामंगलस्थित एक होटलबाट ११ जना अफगान नागरिकलाई प्रहरीले पक्राउ गरेपछि मन्त्रालयले यस्तो आग्रह गरेको हो ।
साथै पहिचान नखुलेका कोही विदेशी नागरिकहरु भेटिएमा नजिकैको प्रहरी कार्यालयमा खबर गर्न पनि सर्वसाधारणलाई मन्त्रालयले आग्रह गरेको समेत गरेको छ ।
Categorized in राष्ट्रिय
