कोरोनाको जोखिमको कारण उपत्यकाकै लामो झोलुङ्गे पुल बन्द
काठमाडौं । कोरोनाको जोखिमको कारण साँगाको मुसि गणेश खोंच (सूर्यमोड) वाट विश्वकै अग्लो कैलाशनाथ महादेवस्थान र लटरम्मेश्वर महादेवलाई जोड्ने झोलुङ्गे पुलमा शुक्रबारबाट आवागमन निषेध गरिएको छ ।
लकडाउनको समयमा एकाएक उक्त पुलमा सयौंको संख्यामा युवायुवतीहरु घुम्न आउने क्रम बढेपछि उक्त पुल बन्द गरिएको हो ।
वडा कार्यालयका अनुसार सम्भावित कोरोनाको भाइरसको जोखिमलाई विचार गर्दै उक्त झोलुङ्गे पुलबाट लकडाउन अवधिभरका लागि आवागमन बन्द गर्ने निर्णय गरेको हो ।
सूर्यविनायक नगरपालिकाको वडा नं ९ र १० को संगममा पर्ने उक्त झोलुङ्गे पुलको बैशाख १ गते उद्धाटन गर्ने पूर्व निर्धारित कार्यक्रम तय भएपनि लकडाउनका कारण स्थगित गरिएको छ । पुलको श्रावण २१ गते शिलान्यास भएको थियो ।
डोलिडारको करिब एक करोड रुपैंयाँको लागतमा निर्माण सम्पन्न यो पुल २२५ मिटर लामो छ । यो काठमाडौं उपत्यकाकै लामो झोलुङ्गे पुल पनि हो ।
यस क्षेत्रबाट सिङ्गो उपत्यका तथा करीब २२ वटा हिमाल हेर्न सकिन्छ ।
Categorized in समाज
