काठमाडौँ । काठमाडौं महानगरपालिकाले कुहिने र नकुहिने फोहर संकलन सुरु गरेको छ ।
आईतवार र बुधवार कुहिने फोहोर संकलनको दिन तय भए अनुसार आज भित्री सहरको रुटबाट कुहिने फोहर संकलन गरिएको महानगरपालिकाले जनाएको छ ।
फोहर संकलन गर्ने क्रममा प्लाष्टिककै झोलामा कुहिने फोहोर ल्याएको देखिएकोपछि नगर्न वातावरण व्यवस्थापन विभागका कर्मचारीहरुले कुहिने फोहोर ल्याउँदा प्लाष्टिकमा पोको नपार्न आग्रह गरेका थिए । यसै रुटमा मंगलवार भने नकुहिने फोहर उठाइने छ ।
दोस्रो रुटमा सोमबार र विहीबार कुहिने फोेहोर र शुक्रबार नकुहिने फोहोर उठाइने गरी महानगरले रुट छुट्टाएको हो । यसरी हप्ताको ४ दिन कुहिने फोहोर र २ दिन नकुहिने फोहोर संकलन गर्ने तालिकाअनुसार आज कुहिने फोहोर संकलन गरिएको हो ।
आजबाट कसैले मिसिएको फोहोर निकाल्यो भने एक पटकमा ५ सय रुपैयाँसम्म जरिवाना गरिनेछ ।
२०६८ सालमा सरकारले जारी गरेको फोहोरमैला व्यवस्थापन ऐन र २०७७ सालमा काठमाडौँ महानगरले जारी गरेको वातावरण तथा प्राकृतिक स्रोत संरक्षण ऐनबमोजिम सहरी सरसफाइ र स्वच्छताका लागि दायित्व पूरा नगर्नेलाई जरिवाना गर्न लागिएको हो ।
Categorized in स्थानिय
