कीर्तिपुरमा एक घरबाट २९ तोला सुनका गरगहना लुटपाट
काठमाडौं । कीर्तिपुर नगरपालिका वडा ४ स्थित एक घरबाट २९ तोला सुन लुटपाट गरिएको छ ।
जिल्ला प्रहरी परिसर काठमाडौंका प्रहरी उपरीक्षक दिनेशराज मैनालीका अनुसार मंगलबार बिहान सवा ३ बजे तिर चोरी भएको हो ।
प्रहरीका अनुसार साढे २ तले घरमा पहिलो तलाको मूल ढोका फुटाएर घर छिरी लुटपाट गरेको हो ।
घरबाट एक लाख ५० हजार रुपैयाँ, अन्दाजी ११ तोला सुनका सात वटा चुरा, पाँच तोला सुनका दुई वटा सिक्री, छ तोला सुनका ९ वटा औंठी, दुई तोला सुनका एउटा नवरत्न लकेट, पाँच तोला सुनका नौ वटा टप चोरी भएको प्रहरीले जनाएको छ ।
त्यसैगरी, दुई वटा हिराका औंठी र तीन वटा हिराको नवरत्न जडान गरिएको तीन वटा औंठी चोरी भएको हो ।
कीर्तिपुरका स्थानीय पत्रकार विरेन्द्र शाक्यका अनुसार लुटपाट नारायण बस्नेतको घरमा भएको हो । घरमा ३ जना मात्र बस्ने गरेको । उनीहरु सबै ७० बर्षमाथिका बृद्धाहरु रहेको प्रहरीले बताएको छ ।
Categorized in समाज
