काठमाडौं महानगर खुल्ला दिशामुक्त क्षेत्र घोषणा
काठमाडौं । काठमाडौं महानगर मंगलवार खुल्ला दिशामुक्त महानगरको रुपमा घोषणा गरिएको छ ।
महानगरस्तरीय खानेपानी, सरसफाइ तथा स्वच्छता समन्वय समितिद्वारा आयोजित कार्यक्रमा जिल्ला खानेपानी, सरसफाइ तथा स्वच्छता समन्वय समितिले सो घोषणा गरेका थिए ।
समितिका अध्यक्ष एवं जिल्ला समन्वय समितिका प्रमुख शिवसुन्दर राजवैद्यले महानगरका प्रमुख बिद्यासुन्दर शाक्यलाई महानगर खुल्ला दिशामुक्त क्षेत्र घोषणा भएको प्रमाण पत्र प्रदान गरेका थिए ।
महानगका प्रमुख शाक्यले महानगरमा यस अघि नै आधारभूत तहको सरसफाइको मापदण्ड पूरा भएको बताउँदै यसलाई पूर्ण सरसफाइमा रुपान्तरण गर्न नागरिक सचेत हुनु पर्ने र सरकारले अघि सारेका कार्यक्रममा नागरिकसहित साझेदारको सक्रिय सहभागिता हुनुपर्ने बताए ।
काठमाडौंलाई खुल्ला दिशामुक्त महानगर घोषणा गर्न यस अघि नै मापदण्ड पूरा भइसकेको भएको समन्वय समितिका अध्यक्ष शिवसुन्दर राजवैद्यले बताए ।
आगामी ३१ गते काठमाडौं जिल्लालाई खुल्ला दिशामुक्त जिल्ला घोषणा गरिने भएको छ ।
महानगरका प्रमुख प्रशासकीय अधिकृत केदार न्यौपाने, वातावरण व्यवस्थापन बिभागका प्रमुख हरिकुमार श्रेष्ठले पनि आ–आफ्ना भनाई राखेका थिए ।
कार्यक्रममा खानेपानी र सरसफाइका क्षेत्रमा काम गर्ने सरकारी तथा गैरसरकारी संघ संस्थाका प्रतिनिधि, महानगरका वडाध्यक्ष तथा कार्यपालिका सदस्यहरुको उपस्थिति थियो ।
Categorized in स्थानिय
