काठमाडौंको पहिलो निर्वाचित मेयर जनकमान श्रेष्ठको निधन
काठमाडौं । काठमाडौं नगरपालिकाका पहिलो निर्वाचित मेयर श्री जनकमान श्रेष्ठको शुक्रवारबिहान निधन भएको छ ।
कलेजो सम्बन्धी क्यान्सर रोगबाट पीडित उहाँ ९२ वर्षको हुनुहुन्थ्यो ।
उहाँको निधनमा काठमाडौं महानगरपालिकाका प्रमुख श्री विद्यासुन्दर शाक्यले गहिरो दुःख व्यक्त गर्नुभएको छ ।
प्रमुख शाक्य आजै पशुपति आर्यघाट पुगी दिवंगत श्रेष्ठको पार्थिव शरीरमा श्रद्धाञ्जलि अर्पण गर्नुभयो । नेपालमा स्थानीय सरकारको जग बसाल्न दिवंगत श्री श्रेष्ठले खेल्नुभएको योगदानको पनि प्रमुख शाक्यले स्मरण गर्नुभएको छ ।
प्रमुख शाक्यले श्री श्रेष्ठका परिवारजन प्रति आफ्नो समवेदना पनि प्रकट गर्नुभएको छ । दिवंगत श्रेष्ठका श्रीमती एवं एक छोरा र एक छोरी हुनुहुन्छ ।
वि.सं. २०१० सालमा भएको तत्कालीन काठमाडौं नगरपालिकाको पहिलो निर्वाचनबाट उहाँ नगरपालिकाको सभापति (मेयर) निर्वाचित हुनुभएको थियो ।
उहाँले न्याय सेवा प्रवेश गरी काठमाडौं जिल्ला अदालतमा न्यायाधीशका रुपमा पनि सेवा गर्नुभएको थियो ।
काठमाडौं महानगरपालिकाले गत वर्ष २४ औं महानगर दिवसका अवसरमा उहाँलाई महानगर सम्मानबाट सम्मानित गरेको थियो ।
आजै पशुपति आर्यघाटमा उहाँको अन्तिम संस्कार सम्पन्न भएको छ ।
Categorized in समाज
