काठमाडौं । काठमाडौँ महानगरपालिकाले शैक्षिक सत्र २०८२/०८३ का लागि कक्षा ११ र १२ मा छात्रवृत्ति कोटाअन्तर्गत दोस्रो चरणको मनोनयन सूची प्रकाशित गरेको छ ।
यस चरणमा ५५४ जना विद्यार्थी छात्रवृत्तिका लागि छनोट भएका छन ।
शिक्षा विभागका अनुसार, दोस्रो चरणमा विज्ञान संकायमा ४१४ जना, व्यवस्थापनमा १०६ जना, कानुनमा ३० जना, शिक्षामा ३ जना र मानविकीमा १ जना विद्यार्थीको नाम समावेश गरिएको छ ।
साउन १५ भित्र छनौट भएका विद्यार्थीहरुले सम्बन्धित शिक्षण संस्थामा भर्ना हुनुपर्ने व्यवस्था गरिएको छ । https://entrance.kathmandu.gov.np/मा गएर सिम्बोल नम्बर, जन्म मिति र प्राप्त पासवर्ड प्रयोग गरी मनोनयन पत्र प्रिन्ट गर्नुपर्नेछ ।
तोकेको समयभित्र भर्ना नगर्ने विद्यार्थीले छात्रवृत्तिमा दाबी गर्न नपाउने शिक्षा विभागले जनाएको छ ।
त्यस्ता रिक्त सिटमा र्यापअप प्रणालीमार्फत पुनः मनोनयन गरिनेछ ।
पहिलो र दोस्रो चरणमा छनोट हुन नसकेका तर प्रवेश परीक्षामा उत्तीर्ण विद्यार्थीहरूका लागि साउन १६ पछि रिक्त सिटमा भर्ना सम्बन्धी सूचना सार्वजनिक गरिने निमित्त शिक्षा विभाग प्रमुख केशव ज्ञवालीले जानकारी दिएको छ ।
यसमा विषय र शिक्षण संस्थाको प्राथमिकता हेरिनेछ ।
१४ हजार बढी विद्यार्थीको प्रतिस्पर्धा
कक्षा १० को पाठ्यक्रममा आधारित प्रवेश परीक्षा २०८२ साउन ३ गते ५४ परीक्षा केन्द्रमा सञ्चालन गरिएको थियो । उक्त परीक्षामा १४,१७३ विद्यार्थी सहभागी भएका थिए ।
१०० पूर्णाङ्कको बहुवैकल्पिक प्रश्नमा गणित, विज्ञान, अङ्ग्रेजी र सामान्य ज्ञान समावेश थियो ।
परीक्षामा १०,८६७ विद्यार्थीले ४०५ अंक कटाएर उत्तीर्ण गरेका थिए ।
देशभरका ७७ जिल्लाबाट १७,२२९ आवेदन प्राप्त भएकामा पहिलो चरणसहित १६,१३७ विद्यार्थी छात्रवृत्तिका लागि छनोट भएका छन ।
छनोटमा प्राथमिकता र आरक्षण
छात्रवृत्तिमा नाम समावेश हुने मनोनयन सूची विद्यार्थीको प्राप्त अङ्क र आवेदनमा उल्लेख भएको शिक्षण संस्थाको प्राथमिकताका आधारमा तयार गरिएको हो ।
साधारण कोटामा सामुदायिक विद्यालय, संस्थागत विद्यालय, काठमाडौं महानगरका स्थायी बासिन्दा र ल्याण्डफिल साइट क्षेत्रमा बसोबास गर्ने विद्यार्थीहरूलाई प्राथमिकता दिइएको छ ।
त्यस्तै आरक्षण कोटामा छात्रा, आदिवासी/जनजाति, मधेसी, खस आर्य, दलित, मुस्लिम, थारु, अपाङ्गता भएका, पिछडिएको क्षेत्रका विद्यार्थी, शहीद/बेपत्तारद्वन्द्वपीडित परिवारका विद्यार्थीहरू समावेश छन ।
Categorized in पालिका
