काठमाडौं । नेपाल प्रिमियर लिग (एनपीएल) दोस्रो संस्करणका लागि सबै तयारी पूरा भएको नेपाल क्रिकेट संघ (क्यान)ले जनाएको छ ।
क्यानले शुक्रबार काठमाडौंमा आयोजना गरेको पत्रकार सम्मेलनमा मंसिर १ गतेदेखि सुरु हुने प्रतियोगिताका लागि आवश्यक सबै प्राविधिक तथा व्यवस्थापकीय तयारी सम्पन्न भइसकेको बताइएको हो ।
यसपटक पहिलोपटक एनपीएलका खेलहरू फ्लडलाइटमा आयोजना हुनेछन ।
क्यानका सचिव पारस खड्काका अनुसार पहिलो संस्करण सफल भएको अनुभवलाई अझ प्रभावकारी बनाउन डे–नाइट म्याचसमेत समावेश गरिएको हो ।
पहिलो संस्करणकै पुरस्कार राशि कायम
क्यानले दोस्रो संस्करणमा पनि पहिलो संस्करणकै पुरस्कार राशि कायम राखेको छ ।
पहिलो संस्करणमा जनकपुर बोल्ट्सले १ करोड १० लाख रुपैयाँसहित उपाधि जितेको थियो । उपविजेता सुदूरपश्चिम रोयल्सले ५१ लाख, तेस्रो कर्णाली याक्सले २५ लाख र चौथो चितवन राइनोजले १५ लाख प्राप्त गरेका थिए ।
४० करोड आम्दानीको लक्ष्य
क्यानले यस संस्करणबाट करिब ४० करोड रुपैयाँ उठाउने लक्ष्य बनाएको छ ।
क्यानका कोषाध्यक्ष पदम खड्काका अनुसार १५–३० करोड रुपैयाँ प्रायोजकबाट मात्र उठ्ने अपेक्षा छ ।
उनका अनुसार टिम ओनरबाट ९ करोड रुपैयाँ, डिस होम गोले ५ करोड ३० लाख रुपैयाँमा डिजिटल प्रसारण अधिकार लिएको छ ।
डिजिटल आम्दानीको मोडेलअनुसार संसारभरिबाट उठ्ने आम्दानीमध्ये ७१ प्रतिशत हिस्सा क्यानको रहनेछ भने २९ प्रतिशत डिसहोमको हुनेछ ।
यस्तै, लीनियर टिभी प्रसारण अधिकार पनि शुक्रबार नै फाइनल भएको क्यानले जनाएको छ ।
उक्त अधिकारको न्यूनतम मूल्य एक करोड रुपैयाँ तोकिएको छ । टिकट बिक्रीबाट मात्र ८ देखि १२ करोड रुपैयाँसम्म संकलन हुने अनुमान क्यानले गरेको छ ।
८ फ्रेन्चाइज टोली सहभागी
प्रतियोगितामा ८ फ्रेन्चाइज टोली सहभागी हुनेछन । सबै टोलीले विदेशी खेलाडी अनुबन्ध गरिसकेका छन । केही खेलाडी नेपाल आइपुगेका छन भने बाँकी क्रमशः आउनेछन ।
उद्घाटन खेल मंसिर १ गते
एनपीएल दोस्रो संस्करणको उद्घाटन खेल मंसिर १ गते अपराह्न ४ बजे त्रिवि क्रिकेट मैदानमा हुनेछ ।
उद्घाटन खेलमा साविक विजेता जनकपुर बोल्ट्स र काठमाडौं गोर्खाजबीच प्रतिस्पर्धा हुनेछ ।
Categorized in मनोरन्जन
