काठमाडौं । इलाम र बझाङमा शनिवार विहान ७ बजेबाट मतदान सुरु भएको छ ।
इलामका सहायक निर्वाचन अधिकृत इन्द्र श्रेष्ठले सबै मतदान केन्द्रहरूमा मतदान सुरू भएको बताएका छन ।
इलामको प्रतिनिधि सभा क्षेत्र नम्बर २ र बझाङको प्रदेशसभा १(१) का मतदान केन्द्रहरूमा मतदान सुरू भएको हो ।
मतदान सुरु भएसँगै प्रमुख दलका र मुख्य प्रतिस्पर्धीभनिएका उम्मेदवारहरूले मतदान गरिसकेका छन ।
इलामा नेपाली कांग्रेसका उम्मेदवार डम्बर खतिवडा, नेकपा एमालेका सुहाङ नेम्बाङ, राष्ट्रिय स्वतन्त्र पार्टीका मिलन लिम्बु, स्वतन्त्र उम्मेदवार डकेन्द्रसिंह थेगिमले मतदान गरिसकेको छ ।
आयोगका अनुसार इलाम–२ मा एक लाख १६ हजार आठ सय ८९ मतदाता छन भने ७९ मतदानस्थल र १४९ मतदान केन्द्र रहेको आयोगले जनाएको छ ।
इलाम–२ मा विभिन्न राजनीतिक दल र स्वतन्त्र गरी १९ उम्मेदवार प्रतिस्पर्धामा छन । यस क्षेत्रमा सुवास नेम्वाङको निधन भएपछि उपनिर्वाचन हुन लागेको हो ।
त्यसैगरी बझाङमा मतदान सुरु भएको निर्वाचन आयोगले जनाएको छ ।
आयोगका अनुसार बझाङको उक्त निर्वाचन क्षेत्रमा कुल ६१ हजार सात सय ४८ मतदाता छन भने ७४ मतदानस्थल र ९३ मतदान केन्द्र रहेको आयोगले जनाएको छ ।
बझाङमा नेपाली कांग्रेसका अभिषेक सिंह लगायत १२ जना उम्मेदवार प्रतिस्पर्धामा छन ।
प्रदेश सभा सदस्य पृथ्वीबहादुर सिंहको निधन भएपछि उपनिर्वाचन हुन लागेको हो ।
मतदान बेलुका ५ बजेसम्म सञ्चालन हुने आयोगले जनाएको छ ।
Categorized in राष्ट्रिय