काठमाडौं । प्रतिनिधिसभा सदस्य निर्वाचन–२०८२ को सन्दर्भमा निर्वाचन आचारसंहिता उल्लंघन गरेको आरोपमा निर्वाचन आयोगले हालसम्म ५१ जनासँग स्पष्टीकरण सोधेको छ ।
आयोगले २१ फागुनमा निर्धारित निर्वाचनलाई लक्षित गर्दै माघ ४ गतेदेखि आचारसंहिता लागू गरेको थियो ।
आयोगका सहायक प्रवक्ता कुलबहादुर जीसीका अनुसार स्पष्टीकरण सोधिएकामध्ये ३० जनाले मात्रै जवाफ बुझाएका छन् भने २१ जनाले अझै स्पष्टीकरण पेश गरेका छैनन् ।
ती व्यक्तिहरूलाई चाँडो जवाफ बुझाउन ताकेता गरिएको आयोगले जनाएको छ ।
जीसीले केही व्यक्तिलाई दोहोर्याएर पनि स्पष्टीकरण सोधिएको जानकारी दिए ।
उनका अनुसार आचारसंहिता उल्लंघन गरेको देखिएमा आयोगले सम्बन्धित पक्षसँग स्पष्टीकरण माग्ने र प्राप्त जवाफका आधारमा आवश्यक जाँचबुझ गरी कारबाहीको निर्णय गर्ने व्यवस्था छ ।
निर्वाचन आयोगले तोकेको आचारसंहिताविपरीत गतिविधि नगर्न र निष्पक्ष तथा मर्यादित निर्वाचन सुनिश्चित गर्न सबै सरोकारवालालाई निर्देशन दिएको छ ।
Categorized in राष्ट्रिय
