काठमाडौं । अमेरिकाभर राष्ट्रपति डोनाल्ड ट्रम्प र उनको प्रशासनका नीतिविरुद्ध व्यापक प्रदर्शनहरू भएका छन ।
‘नो किङ्ग्स’ नाम दिइएको यो राष्ट्रव्यापी विरोध अभियानअन्तर्गत शनिबार देशभर ३,००० भन्दा बढी स्थानमा र्यालीहरू आयोजना गरिएको आयोजकहरूले बताएका छन ।
प्रदर्शनकारीहरूले विशेषगरी इरानसँगको सम्भावित युद्ध, कडा अध्यागमन नीति र बढ्दो महँगीको विरोध गरेका छन ।
आयोजकहरूले यस आन्दोलनलाई लोकतन्त्रको रक्षा र निरंकुशताको विरोधमा गरिएको शान्तिपूर्ण नागरिक अभियानका रूपमा व्याख्या गरेका छन ।
तर ह्वाइट हाउसले भने यी प्रदर्शनलाई अस्वीकार गर्दै “ट्रम्पविरोधी अतिशयोक्तिपूर्ण प्रतिक्रिया” मात्र भएको टिप्पणी गरेको छ ।
मिनेसोटामा केन्द्रित विरोध
मिनेसोटा राज्यको सेन्ट पलस्थित स्टेट क्यापिटल परिसर शनिबारको प्रदर्शनको मुख्य केन्द्र बनेको थियो। हजारौं प्रदर्शनकारीहरू भेला भएको कार्यक्रममा गभर्नर टिम वाल्ज, सिनेटर बर्नी स्यान्डर्स र सांसद इल्हान ओमार ले सम्बोधन गरेका थिए ।
उनीहरूले ट्रम्प प्रशासनको अध्यागमन नीतिको कडा आलोचना गर्दै वर्तमान अवस्थालाई अमेरिकी लोकतन्त्रका लागि चुनौतीपूर्ण क्षणको रूपमा चित्रण गरेका छन ।
कार्यक्रममा चर्चित गायक ब्रुस स्प्रिंगस्टीन ले सांगीतिक प्रस्तुति दिएका थिए भने अभिनेत्री जेन फोंडा ले पीडित परिवारको सन्देश पढेर सुनाएकी थिइन ।
वासिङ्टन डीसी र न्युयोर्कमा ठूलो भीड
देशको राजधानी वासिङ्टन डीसी मा हजारौं प्रदर्शनकारीहरू नेसनल मल र लिंकन मेमोरियल आसपास भेला भएका थिए ।
त्यस्तै, न्युयोर्क को टाइम्स स्क्वायर र म्यानहटन क्षेत्रमा पनि ठूलो संख्यामा मानिसहरूले मार्च गरेका थिए। भीडका कारण धेरै सडकहरू बन्द गर्नुपरेको थियो ।
प्रदर्शनमा सामाजिक सञ्जालका प्रभावशाली व्यक्तिहरू पनि सहभागी भएका थिए, जसले युवाहरूलाई लोकतन्त्रको पक्षमा उभिन आह्वान गरेका थिए ।
अन्य सहरहरूमा पनि प्रदर्शन
लस एन्जलस, सिकागो लगायतका सहरहरूमा पनि हजारौं मानिसहरूले प्रदर्शन गरेका छन ।
लस एन्जलसमा सांगीतिक र रचनात्मक शैलीमा विरोध गरिएको थियो भने केही स्थानमा प्रहरीसँग सामान्य झडपसमेत भएको जनाइएको छ ।
साना सहर र अन्तर्राष्ट्रिय समर्थन
यो आन्दोलन ठूला सहरहरूमा मात्र सीमित नभई रिपब्लिकन प्रभाव भएका राज्यहरू तथा साना सहरहरूमा पनि फैलिएको छ ।
यस्तै, पेरिस, लन्डन र लिस्बन मा रहेका अमेरिकी नागरिकहरूले पनि समर्थन प्रदर्शन गरेका छन ।
ट्रम्पको प्रतिक्रिया
राष्ट्रपति ट्रम्पले आफ्ना कदमहरू देशको पुनर्निर्माणका लागि आवश्यक भएको दाबी गर्दै आएका छन्। आफूलाई तानाशाह भनिएको आरोपलाई उनले अस्वीकार गरेका छन्।
यसअघि पनि यस्तै प्रदर्शनहरूमा लाखौं मानिस सहभागी भइसकेका छन ।
पछिल्लो आन्दोलनले आगामी मध्यावधि चुनावमा कस्तो प्रभाव पार्नेछ भन्ने विषय अहिले अमेरिकी राजनीतिक वृत्तमा चासोको केन्द्र बनेको छ ।
Categorized in अन्तर्राष्ट्रिय
