काठमाडौं । प्रतिबन्धित अनलाइन बेटिङ ‘एप वान एक्स बेटु’मा सट्टेबाजी गर्ने कार्यमा संलग्न भएको आरोपमा २ जना हास्य कलकारसहित ८ जना पक्राउ परेका छन ।
काठमाडौं उपत्यका अपराध अनुसन्धान कार्यालका अनुसार पक्राउ पर्ने कलाकारहरुमा बल्छी ध्रुवे भनिने मरिचमान श्रेष्ठ र राजु मास्टर भनेर चिनिने राजु पौडेल छन ।
प्रहरीले अन्य कलाकारको नाम भने सार्वजनिक गरेको छैन । उनीहरूलाई काठमाडौंको स्वयम्भूलगायतका ठाउँबाट नियन्त्रणमा लिइएको हो ।
पक्राउ परेका कलाकारहरूले युट्युबमार्फत वानएक्स बेटको विज्ञापन गरेको आरोप छ । युट्युबमा प्रोमो कोड प्रयोग गरी वानएक्स बेटिङमा छुट प्राप्त गर्न सकिने भन्दै विज्ञापन गरेको देखिन्छ ।
हिजो बुधबार मात्र यसै प्रकरणमा अनलाइनमार्फत जुवा खेलाउने गिरोहका पाँच जना पक्राउ परेका थिए ।
उनीहरूमध्ये एकै व्यक्तिले विभिन्न व्यक्तिका कागजात प्रयोग गरी ६३ वटा खाता खोलेर ६४ करोडको कारोबार गरेको खुलेको प्रहरीले जनाएको छ ।
पक्राउ परेकाहरूलाई मुलुकी अपराध संहिता २०७४ को दफा १२५ को उपदफा ४ बमोजिम सट्टाबाजी गर्न÷गराउन नहुने कसुरअन्तर्गत थप अनुसन्धान र कारबाहीका लागि जिल्ला प्रहरी परिसर भक्तपुर र काठमाडौंमा पठाइएको छ ।
Categorized in समाज
