अन्ततः रवि लामिछानेसहित ३ जनाविरुद्ध मुद्दा दर्ता
काठमाडौं । पत्रकार शालिकराम पुडासैनी आत्महत्या प्रकरणमा समातिएका चर्चित पत्रकार रवि लामिछानेसहित ३ जनाविरुद्ध मुद्दा दर्ता भएको छ ।
जिल्ला सरकारी वकिल कार्यालय चितवनले उनीहरु विरूद्ध जिल्ला अदालत चितवनमा मुद्दा दर्ता गरेको हो ।
पुडासैनीलाई आत्महत्या गर्न दुरूत्साहन गरेको आरोपमा समातिएको उनीहरुविरुद्ध मुद्धा हाल्न प्रयाप्त प्रतिवेदन भएको भन्दै मुद्दा दर्ता गरेको कार्यलयले जनाएको छ ।
पुडासैनी आत्महत्या प्रकरण अनुसन्धान प्रतिवेदन प्रहरीले जिल्ला सरकारी वकिल कार्यालय चितवनमा पेश गरेको थियो ।
प्रमुख जिल्ला सरकारी वकिल यदुनाथ शर्माका अनुसार तीनै जनालाई पाँच वर्ष कैद र ५० हजार जरिवाना माग गरिएको हो।
अदालत श्रोतका अनुसार आरोपीहरुसँग बयान सुरु भएको र बयानपश्चात उनीहरूलाई थुनामै राखेर मुद्दा अघि बढाउने, धरौटी माग्ने वा साधारण तारेख छोड्नेबारे बहस हुनेछ ।
उनीहरु दोषी ठहरिए ५ बर्ष जेल र ५० हजार जरिवना हुने प्रचलित कानुनमा प्रावधान रहेको छ ।
लामिछानेसहित तीन जनालाई साउन ३० गते प्रहरीले पक्राउ गरेर अनुन्धान अघि बढाएको थियो । लामिछानेसँगै अस्मिता कार्की र युवराज कँडेललाई पनि पक्राउ गरेको हो ।
पुडासैनी साउन २१ गते चितवनको एक होटलमा झुण्डिएको अवस्थामा फेला परेका थिए ।
Categorized in समसामायिक
