मतदान सकियो, इलाममा ५८ र बझाङमा ५० प्रतिशत मतदान
काठमाडौं । निर्वाचन आयोगले इलाम र बझाङमा निर्धारित समय बेलुका ५ बजे मतदान सम्पन्न भएको जनाएको छ ।
शनिबार इलाम–२ मा प्रतिनिधिसभा र बभाङ–१ मा प्रदेशसभा सदस्य चयनका लागि उपनिर्वाचनमा मतदान शान्तिपूर्ण र उत्साहपूर्ण रहेको आयोगले जनाएको छ ।
साँझ अयोगले जारी गरेको विज्ञप्ति अनुसार इलाम–२ मा ५८ प्रतिशत र बझाङ–१ को प्रदेशसभा निर्वाचन क्षेत्रमा ५० प्रतिशत मतदान भएको छ ।
आयोगले दुबै क्षेत्रमा ४ मंसिर २०७९ मा भएको चुनावमा भन्दा कम मतदान भएको जनाएको छ । इलाम– २ मा ५९ दशमलव ७८ प्रतिशत र बझाङ– १ प्रदेशसभा निर्वाचन क्षेत्रमा ५२ दशमलव ९८ प्रतिशत मतदान भएको थियो ।
उपनिर्वाचनमा इलाम–२ मा १ लाख १५ हजार ८८९ मतदाता र बझाङ–१ प्रदेश सभा क्षेत्रमा ६१ हजार ७४८ मतदाता थिए ।
इलाममा आजै मतगणना हुने जनाइएको छ । इलाम नगरपालिका– ७ स्थित गौतम बुद्ध सभागृहमा साँझ ११ः०० बजेभित्र मतपेटिका संकलन हुने आयोगले जनाएको छ ।
बझाङमा भने हवाइ मार्गबाट पनि मतपेटिका ढुवानी गर्नुपर्ने भएकाले आइतबार मात्र मतगणना हुने भएको हो ।
Categorized in राष्ट्रिय
